foto de Bastiaan Heus/popupportraits.nl 2023
Esperanto estas instruata en la Universitato de Amsterdamo ekde 1948. Ekde 1998 la Universitato de Amsterdamo (UvA) havas specialan katedron pri Interlingvistiko kaj Esperanto. Interlingvistiko estas branĉo de lingvistiko, kiu pristudas internacian kaj interkulturan komunikadon inter homoj, kiuj ne parolas komunan gepatran lingvon.
La speciala katedro pri Interlingvistiko kaj Esperanto estas parto de la fakgrupo Lingvistiko. Ekde februaro 2014, profesoro Dr. Federico Gobbo instruas je ĉi tiu speciala katedro.
Laŭ la laborpriskribo de la universitato, la tenanto de la katedro respondecas pri la daŭrigo kaj plivastigo de edukado kaj esplorado en la kampo de interlingvistiko, kun aparta atento al la teorio kaj praktiko de planlingvoj. Esperanto ludas centran rolon en tio.
Se vi volas lerni Esperanton ĉe la Universitato de Amsterdamo aŭ interesiĝas pri ĉi tiu studo, vidu: Lerni Esperanton ĉe la Universitato de Amsterdamo.
Financa subteno
La Universala Esperanto-Asocio (UEA) kaj Esperanto Nederland disponigas monon por financi ĉi tiun specialan katedron. Aliaj landaj Esperanto-asocioj kaj kelkaj privatuloj ankaŭ finance subtenas la katedron.
La enspezoj ne sufiĉas por kovri ĉiujn agadojn. Tial financa subteno estas tre aprezata.
La banknumero estas:
NL 10 TRIO 078 68 44 167
t.a. Esperanto Nederland en Capelle aan den IJssel
Kun mencio: Amsterdama Katedro
Eblas ankaŭ konkludi interkonsenton por perioda donaco en mono.
Ni antaŭĝojas viajn kontribuojn al la daŭra ekzisto de ĉi tiu unika katedro. Pro ĝia akademia valoro, sed precipe pro la multaj kromaĵoj de kiuj profitas Esperanto en Nederlando.
Per tiu ĉi speciala katedro, la UvA daŭrigas tradicion de pli ol duonjarcenta instruado en kaj pri Esperanto, tradicio al kiu, ĝis la kreo de la katedro, la nomoj de Pragano, Middelkoop kaj Moerbeek, inter aliaj, estas nedisigeble ligitaj.
Respondeca pri konservado kaj financado de la katedro ĉe la Universitato de Amsterdamo estas la Universala Esperanto-Asocio, UEA. La ĉefoficejo de UEA situas en Roterdamo
La asocio Esperanto Nederland ĉiujare aljuĝas al ĉi tiu katedro sumon fiksitan de la membrokunveno. Ĉi tiu aprobo validas por periodo de 5 jaroj kaj nuntempe daŭras ĝis inkluzive 2028.