Esperanto restas lingvo de paco, ankaŭ je la 1‑a de aprilo
Sub la titolo “Esperanto Nederland rifuzas militistan uzadon de Esperanto” ni publikigis aprilan ŝercon en nia retejo.
En tiu artikolo ni rakontis, ke la defendfortoj de Eŭropo ekuzos Esperanton por la interlanda komunikado. Ene de kelkaj jaroj ĉiuj militistoj kaj civiluloj ĉe la Ministerio pri Defendo devus lerni la lingvon. La Ministerio pri Defendo laŭ la artikolo petus nian subtenon por tio. Nia respondo estis, ke ni tion ne farus, ĉar tio kontraŭas la idealon, por kiu Esperanto staras.
Reagoj
Pri la ŝerco ni ricevis diversajn reagojn. Iuj homoj ne povis aprezi la humoron “en ĉi tiu tempo” kaj reagis kritike. Ni ricevis ankaŭ pozitivajn reagojn de homoj, kiuj ĝuis la ŝercon. Kelkaj personoj petis pliajn informojn, inter ili ĵurnalistoj de kaj loka kaj landa gazeto. Kompreneble ni klarigis al ili, ke temas pri aprila ŝerco. Laŭ la konsilo de unu el ili ni poste eĉ pli klare atentigis pri la dato, la 1‑a de aprilo.
Kial ni faris ĉi tiun ŝercon
Per ĉi tiu aprila ŝerco ni volis atentigi pri grava mesaĝo: la graveco resti en dialogo unu kun la alia. La juda, pola‑rusa okulkuracisto Ludoviko Zamenhof kreis la lingvon Esperanto en periodo de grandaj interetnaj streĉoj — ĝuste por kunigi homojn.
Ankaŭ ni, kiel Esperanto Nederland, opinias grave respekti aliajn homojn kaj aliajn kulturojn. Esperanto povas esti valora ilo por tio. Per Esperanto ni malkovras, kiel belaj kaj interesaj aliaj homoj kaj iliaj fonoj estas.